Ердоған Қырғызстанға сапармен барады
БІШКЕК. KAZINFORM – 5 қарашада Түркия президенті Режеп Тайип Ердоған Қырғызстанға мемлекеттік сапармен барады, деп хабарлайды Kazinform меншікті тілшісі.
Қырғыз Республикасы Президенті Әкімшілігінің сыртқы саясат бөлімінің меңгерушісі Мұратбек Азымбакиевтің айтуынша, алдағы сапар аясында Қырғызстан мен Түркия басшыларының шағын құрамда кездеседі, сондай-ақ екі мемлекет басшыларының төрағалығымен Стратегиялық ынтымақтастық жөніндегі жоғарғы кеңестің алтыншы отырысы өтеді.
«Сапар қорытындысы бойынша екі ел арасындағы стратегиялық ынтымақтастықты кеңейтуге және мемлекетаралық қатынастарды одан әрі нығайтуға бағытталған бірқатар екіжақты құжаттарға қол қою жоспарланып отыр. Сондай-ақ 6 қарашада Түркия Республикасының Президенті Режеп Тайип Ердоған Түркі мемлекеттері ұйымының саммитіне қатысады», - деп атап өтті шенеунік.
Бұған дейін Мемлекет басшысы Қасым-Жомарт Тоқаев Президент Эмманюэль Макронның шақыруымен 4-5 қараша күндері Франция Республикасына мемлекеттік сапармен баратынын жазған болатынбыз.
