Ердоған: Түркия Аляска саммитін құптайды, Украинадағы бейбітшілікті жақтайды

АСТАНА. KAZINFORM – Түркия президенті Режеп Тайип Ердоған АҚШ президенті Дональд Трамп пен Ресей президенті Владимир Путиннің Аляскада өткен келіссөздері туралы айтты, деп хабарлайды Kazinform Anadolu агенттігіне сілтеме жасап.

Президент Ердоған бұл мәселе туралы әлеуметтік желідегі парақшасында жазды.  

– АҚШ президенті Трамп пен Ресей президенті Путиннің Аляскадағы келіссөздері Ресей мен Украина арасындағы соғысты тоқтату жолдарын іздеуге жаңа серпін берді. Біз Аляска саммитін құптаймыз және Украина президенті Зеленскийді қамтитын бұл жаңа процесс тұрақты бейбітшіліктің негізін қалайды деп үміттенеміз, - деді Түркия президенті. 

Президент Ердоған Түркияның Украина жерінде бейбітшілік орнату үшін жан-жақты қолдау көрсетуге дайын екенін атап өтті. 

Еске сала кетейік, бұған дейін Еуроодақ басшылары Путин мен Трамп кездесуінен кейін бірлескен мәлімдеме жасаған болатын.