Ерекше саяхат: қытайлық әке балаларымен бірге 800 шақырым жол жүрді

АСТАНА. KAZINFORM — Қытайлық әке балаларының бойында табандылық пен төзімділікті қалыптастыру үшін өзінің ең әдемі және қиын саяхаттарының бірін аяқтады, деп хабарлайды South China Morning Post. 

Ол 10 жасар қызы және 8 жасар ұлымен 31 күнде барлығы 800 шақырымды жүріп өтіп, мінездерін шыңдауға тырысты.

Әкесінің айтуынша, ол балаларының бойына оңайлықпен берілмейтін, қиындықтарды жеңіп, бастаған ісін аяқтау сияқты маңызды өмірлік дағдыларды сіңіруді мақсат еткен.

— Менің балаларым оңай жеңілуге дайын, мен олардың қиындықтарды жеңіп, маңызды сабақ алғанын қалаймын, — деді әкесі өз тәжірибесін сипаттап.

Сапар барысында әке өз жүгі ретінде 10 келі рюкзак арқалап жүрсе, балалар әрқайсысы күніне 23 шақырымнан кемінде 5 келі жүкті арқалап жүрді.

— Балаларым шаршаған кезде менен де күшті екенін айтып, жігерлендіріп, қолдадым. Бұл олардың психикалық және физикалық төзімділігін нығайтты, — дейді әке.

Сонымен бірге, сапар барысында балаларға күнделікті шығын шегін белгілеп, егер шығын осы шектен асып кетсе, айырмасын өз қалтасынан төлеуге тура келетін. Бұл оларды экономикалық жауапкершілік пен ақшаны басқаруға үйретті.

Бұл оқиға әлеуметтік желілерде қызу талқыға түсті. Қолданушылар әкенің іс-әрекетін «нақты және тиімді тәрбие» деп санап, оның әдістерін оң бағалады. Көпшілік мұндай жаттығулардың балалардың психологиясы мен мінезін шыңдау үшін қажет екенін баса айтты.

Бұл тарихи саяхат балалар үшін ғана емес, бүкіл отбасы үшін есте қалатын өмірлік сабақ болды, олардың арасындағы қарым-қатынасты нығайтып, ата-аналар үшін де бала тәрбиесінің жаңа үлгісін қалыптастырды.

Еске сала кетейік, Қытайда аккордеонда синхронды ойнаудан Гиннестің жаңа рекорды орнатылды.