Ереван мен Баку бейбіт келісімге келуін толық құптаймыз — Мұрат Нұртілеу

АСТАНА. KAZINFORM — Ереван мен Баку арасында Бейбітшілік келісімге қол қойылуын толық құптаймыз. Бұл туралы ҚР Премьер-Министрінің орынбасары — Сыртқы істер министрі Мұрат Нұртілеу айтты.

— Шағын және кеңейтілген құрамда өткен келіссөздер барысында өңірлік және жаһандық маңызы бар өзекті мәселелер бойынша пікір алмастық. Өздеріңізге мәлім, Қазақстан кез келген даулы мәселелерді шынайы тату көршілік пен халықаралық құқық қағидаттары негізінде тек бейбіт жолмен шешудің қажеттігін үнемі мәлімдеп келеді. Осы тұста, біз Ереван мен Баку арасындағы Бейбітшілік келісімге қол қоюға деген ниетті толық құптаймыз, — деді ол Арменияның Сыртқы істер министрі Арарат Мирзоянмен кездесуде.

Сондай-ақ министр бұл келісім екі ел ғана емес, тұтас Еуразия кеңістігі үшін маңызды екенін атап өтті.

— Бұл тарихи қадам өңірдегі жаңа стратегиялық мүмкіндіктерге жол ашып, Еуразия аумағында қарқынды экономикалық, көлік-транзиттік және энергетикалық ынтымақтастыққа елеулі серпін береріне кәміл сенемін, — деді Мұрат Нұртілеу.

Атап өтейік, қазіргі таңда Арменияда 100-ден астам қазақстандық кәсіпорын жұмыс істеп тұр. 

Еске салсақ, өткен жылдың соңында екі ел арасындағы достық қарым-қатынас тақырыбында ауқымды шара өткен болатын.