Еркін күрес: Нұрқожа Қайпанов пен Болат Сақаев Азия чемпионатының финалына шықты
АСТАНА. KAZINFORM - Еркін күрес шеберлері Нұрқожа Қайпанов пен Болат Сақаев Амманда (Иордания) өтіп жатқан Азия чемпионатының финалдық кезеңіне жолдама алды.
Алдымен бозкілемге шыққан Нұрқожа Қайпанов 74 келіге дейінгі салмақта сәтті өнер көрсетті. Ол жартылай финалда ирандық Мохаммад Реза Шакериді 6:1 есебімен қапы қалдырды.
86 келіге дейінгі салмақта сынға түскен Болат Сақаев та (86 кг) Иордания астанасында өтіп жатқан Азия чемпионатының финалына өтті. Отандасымыз жартылай финалда қытайлық балуанды 12-1 есебімен жеңді. Енді Сақаев финалда Иран балуанымен белдеседі.
Айта кетейік, финалдық белдесулер Астана уақытымен 20:00-де басталады.
Өкінішке қарай, 92 келіге дейінгі салмақта Азамат Дәулетбеков финалға шыға алмады. Жартылай финалда ирандық балуанға 12:0 есебімен жол берді. Қазақстандық балуан ендігі кезекте қола медаль үшін күреседі.
Еске салсақ, бұған дейін Қытайда тұратын қандасымыз Кабиран Абушайманұлы Иордания астанасы Амман қаласында өтіп жатқан Азия чемпионатында қола медаль еншілегенін жазған едік.
