Еркін күрестен АЧ: Отандық балуандар медальдар кестесінде үздік үштікке тұрақтады
АСТАНА. KAZINFORM — Иордания астанасы Амман қаласында өткен Азия чемпионатында еркін күрестен ел құрамасы медальдар кестесінде үздік үштікке тұрақтады.
Құрлықтық додада қазақстандық балуандар бір алтын, екі күміс, екі қола алды. Сол арқылы медальдар кестесінде үшінші орынға табан тіреді.
Азия чемпионатында Нұрқожа Қайпанов (74 келі) Азия чемпионы атанса, Болат Сақаев (86 келі) пен Ризабек Айтмұхан (97 келі) күміс жүлдегер болды.
Ал Рахат Қалжан (57 келі) мен Азамат Дәулетбеков (92 келі) қола медаль еншіледі.
Төрт алтын, бір күміс, төрт қола алған Иран құрамасы көш басында тұр. Екінші орынға үш алтын, үш қоламен Жапония жайғасты.
Сондай-ақ одан кейінгі орындарды Қырғызстан (бір алтын, бір күміс), Солтүстік Корея (бір алтын, бір қола) және Моңғолия (екі күміс, үш қола) өзара бөлісті.
