Ертең Өзбекстан, Тәжікстан және Қырғызстан президенттерінің алғашқы саммиті өтеді
ТАШКЕНТ. KAZINFORM – 31 наурызда Тәжікстанның Худжанд қаласында Шавкат Мирзиёев, Эмомали Рахмон және Садыр Жапаров бас қосады, деп хабарлайды Kazinform агенттігінің меншікті тілшісі.
Осы орайда алғашқы үшжақты саммитттің мән-маңызы мен оның барысында талқылануы ықтимал мәселелерге қатысты белгілі өзбекстандық саясаттанушы Фарход Толипов пікір білдірді.
— Кейінгі жылдары Орталық Азия мемлекеттері басшыларының Консультативтік кездесуі аясында аймақтық ынтымақтастық дамып келеді. Бұл ретте елдер арасында екіжақты форматтағы келіссөздер де жүріп жатыр. Жоспарланып отырған үшжақты саммит ынтымақтастық жолында өзара іс-қимылдарды пысықтауға мүмкіндік беретін тағы бір алаң болмақ. Сондықтан оның барысында аталған үш мемлекетке ғана тән мәселелер талқыланады. Тиісінше, Өзбекстан, Тәжікстан және Қырғызстан басшыларының саммиті ұйымдастырылып отыр, - деді Фарход Толипов.
Саясаттанушы атап өткендей, саммит аясында Тәжікстан мен Қырғызстан арасындағы шекара мәселесіне нүкте қойылмақ.
— Қырғызстан мен Тәжікстан таяуда ғана шекара мәселесін реттеді. Бұл келіссөздерді ұйымдастыру және екі ел арасындағы түйткілді шешуге Өзбекстан да айтарлықтай күш салды. Сондықтан шекара мәселесіне нүкте қойып, оны ресми құжат ретінде бекіту маңызды. Айта кету керек, Өзбекстан, Тәжікстан және Қырғызстанның шекаралары бір аймақта тоғысады. Осыған байланысты аталған мәселенің күн тәртібінде болатыны сөзсіз, - деп пікір қосты саясаттанушы.
Фарход Толиповтың пайымынша, Консультативтік кездесудің мәртебесін көтеретін уақыт келді. Яғни, өңірлік ынтымақтастықты тиімді ілгерілету үшін бұл форматты Кеңес деңегейіне шығару қажет.
— Биыл Өзбекстанда Орталық Азия мемлекеттері басшыларының жетінші Консультативтік кездесуі өтеді. Тиісінше, Тәжікстанның Худжанд қаласында өтетін саммит аталған іс-шараға дайындық болуы да мүмкін. Өйткені, аймақтағы интеграцияны жаңа деңгейге шығару керек. Осыған байланысты Консультативтік кездесуде инновациялық шешімдер қабылдануы ықтимал. Сондықтан сұрақтарды алдын ала талқылап, кездесуге дайындық барысын пысықтау қажет, - деді Фарход Толипов Kazinform тілішісінің сауалына жауап бере отырып.
Саясаттанушының пікірінше, транзиттік дәліздерді дамыту мәселесі де саммиттің күн тәрбінде болады. Фарход Толиповтың ойы Орталық Азия елдерінің экспорттық әлеуетін арттыру өңір мемлекеттерінің әлемдік саясаттағы салмағын арттыра түседі дегенге саяды.
— Қазіргі жаһандану кезеңі көлік-логистикалық байланыстарды дамытуды қажет етеді. Сондықтан жоспарланып отырған саммит барысында мультимодалдық дәліздер мәселесі де назардан тыс қалмайды. Санкциялар жағдайында Орталық Азияның бір елінде туындаған мәселе көршілес мемлекеттерге де әсер етпей қоймайды. Осы тұрғыдан алғанда бізге ынтымақтастықты нығайту керек. Яғни, бір-бірімізді хабардар ете отырып әрекет етуіміз керек, - деп түйіндеді Фарход Толипов.
Еске салайық, таяуда Kazinform агенттігіне сұхбат берген Өзбекстанның бұрынғы Сыртқы істер министрі Саидмухтор Саидкасымов Орталық Азияның әлемдік саясаттағы салмағы арта түскенін мәлімдеп еді.
