Ертеңіне еңбекпен жол жалғастырған айтулы ауыл - Қызылорда облысы

ҚЫЗЫЛОРДА. Шілденің 7-сі. ҚазАқпарат (Руслан Игілік) - Бұқарбай батыр ауылы Жалағаш ауданының орталығынан 18 шақырым қашықтықта қоныс­тан­ған.

Қазіргі таңда ауылдық округте қоныстанған 374 отбасында 2034 жан тұрады. Қай кезден бері егін және мал шаруашылығымен айналысып келе жатқан ауыл тұрғындары бүгінгі күні де осы кәсібін өркендетуге бетбұрыс жасап келеді. Тоқырау кезеңінің тұза­ғына ілікпей, өзіне тиесілі тірлігін сақтап қалған ауылдағы шаруашы­лықтардың ісі күн санап ілгерілеуде. Бүгінде елді мекенге тиесілі 36668 га жер көле­мінің 15665 гектары ауыл шаруа­шы­лы­­ғына жарамды саналады. Со­ның ішін­де 6148 га жер егістікке пай­да­­ланылса, шабындыққа 2921, жайы­лымға 6596 га жер көлемі игерілуде. Келешекте пайдалануға жарамды 5338 гектар жері және бар.

Ауылдағы ірілі-ұсақты 20 шаруа­шылық өз шаруасын ілгерілетуде ты­ным­сыз еңбек етіп келеді. Соның ішін­де өткен жылы «Байтабын» ЖШС 731 гек­тарға күріш егіп, көздеген межеден шы­ға білді. Техникалары мен басқа да қажеттіліктерін сайлап алған шаруа­шы­лық төрағасы Сапар Мыхановтың қажырлы қайратын тұрғылықты ха­лық жоғары бағалайды. Ауыл топы­ра­ғымен тыныстаған азамат 1999 жылдан бері аталмыш шаруашылыққа төраға болып, тасын өрге сүйреуге зор ықпал етіп келеді.

Сол сияқты ауданға қарасты үш ауылдық округты қамқорлығына ал­ған «Алтын-дән ПВА» ЖШС өткен нау­қанда Бұқарбай батыр ауылында да 500 гектар жерге сыр салысын өсіріп, қамбаны алтын дәнге толтырды. Ал заман көшіне ілесе білген қызыл­орда­агросервистіктер 875 гектарға күріш егіп, жылды олжалы аяқтады. 2002 жылдан бастап «Алуан-Ас» инвес­ти­ция салып, жұмысын бір жүйеге түсірген бұл серіктестікте де ауқымды істер атқарылуда.

Ауылда кәсібін дөңгелеткен жандар аз емес. Тұрғын­дар күнделікті керек-жарағын ауыл­дағы төрт дүкеннен алып отыр. Елді ме­кен тұрғындарының облыс орталы­ғына қатынауы да қиындық туғызбай­ды. Күніне бір мезгіл Бұқарбай-Қызыл­орда бағытында автобус қатынаса, аудан орталығына тиімді бағада таксилер ерсілі-қарсылы жүріп тұр.

Бұған дейін қиындық туғызып келген ауызсумен қамту жолға қойыл­ған. Жергілікті қазынадан ауызсу жүйе­сінің 6 шақырымына күрделі жөндеу жүргізуге 30 млн. теңге қаралып, 28 су шүмектері жаңартылды. Ауыл әкімі­нің айтуынша, жаңа жылға тағы 5 ша­қырым су құбырын күрделі жөндеу сұралып отырса керек. Бүгінде ауыл халқы екі мезгіл 1 сағаттан ауызсумен қамтамасыз етіліп отыр. Сол сияқты ауылдағы телефон байланысы да шешімін табуда. Қазіргі таңда елді мекенде 160 телефон нүктесі жұмыс жасауда. Алдағы уақытта бұған қо­сым­ша 140 радио-телефон нүктесін қосу жоспарлануда. Интернет жүйесі де іске қосылған. Бұл ауыл халқына кез келген бағытта байланыса алуына мүмкіндік туғызып отыр. Сол сияқты ауыл әкімдеріне берілетін 1 млн. теңгені тиімді пайдалана отырып ауылдағы Бұқарбай батыр көшесіне жарық­тан­дыру жұмыстары жүргізілді. Көркейту-көгалдандыру жұмыстары да көңіл­ден тыс қалмапты. Пошта қызметі де жүйелілік танытып тұр.

Өткен жылы батыр атындағы ауыл тұрғындары «Жол картасына» өзіндік үн қоса білді. Аталмыш бағдарлама аясында ауылдағы №13 «Балдырған» балабақшасына 10 млн. 11 мың теңгеге екі бу қазандығы алынып, жылу мәселесі өз шешімін тапты. Қазірде балалар мекенінің жұмысы санитарлық талапқа сай. Ыстық тамақпен қамту ісі жолға қойылған. Асханаға қажетті жаңа техникалар алынған. Балаларды дәрігерлік қадағалау жұмысы жүйе­лілік танытып тұр.

Мұндай құбылыс ауылдық жан­ұялық емхана мен мәдениет үйіне де тән. 1983 жылы пайдалануға берілген екі қабатты дәрігерлік емхана 25 орын­мен жұмыс жасауда. Бір жедел жәр­дем көлігі науқас жандарға дер кезінде көмек қолын созып келеді. Ал 1989 жылы іргесі қаланған ауылдық мәде­ниет үйі қазірде 370 орынды құрайды екен. Мәдениет үйінің директоры Ұлтай Пірмаханованың айтуынша, алдағы уақытта ғимаратқа күрделі жөндеу жүргізу қажеттілігі туындауда.

Бүгінде бұл ғимаратта бірнеше мекемелер топтастырылған. Оның ішінде халыққа қызмет көрсету орта­лығы бөлімшесінің ашылуы жергі­лікті жұртшылықты зор қуанышқа бөлеп отыр. Ауыл тарихынан терең сыр шер­тетін мұражай да осында орналасып­ты. Онда 450-дей құнды экспонаттар сақтаулы. Ауыл кітапханасында түрлі жанрдағы 16 мыңға жуық білім бұлағы жинақталыпты.

Келешек ұрпағымызға сапалы білім беруді үйлестіріп келе жатқан №33 орта мектептің жұмысы көңілге қуаныш ұялатады. Бүгінде мектепте 2 ауысыммен 398 оқушы дәріс алады.

Мектеп директоры Елубай Әбді­қадыров аз қамтамасыз етілген отба­сы­нан шыққан 60 бала ыстық тамақпен қамтылып отырғанын алға тартады. Мек­тепте үш кабинет интернет жүйесіне қосылса, бес сынып бөлмесі интерак­тив­тік тақталармен жабдықталған. Мектеп кітапханасында 23891 кітап қоры жинақталған. Сондай-ақ «Диплом­мен - ауылға» акциясының да ауыл мектебіне ықпалы тимей қалмапты. Бүгінде аталмыш бағдарлама аясында білім ошағында үш мұғалім жұмыс жасауда.

Қалай дегенде де ауыл тұрғын­да­ры әрдайым еліміздің өркендеуіне өз үлестерін қосуды мақсат тұтады. Ұлы мұратқа жетуді көздеген ауыл жұрт­шы­лығының толағай тірлігінен осыны аңғарғандаймыз.