Ертіс-Баян өңірінде бес айда жол апатынан 3 бала көз жұмған

ПАВЛОДАР. KAZINFORM — Тағы 41 жасөспірім апат салдарынан жарақат алған. Балалардың қатысуымен жалпы саны 36 жол-көлік оқиғасы тіркелген.

Павлодарлық полицейлер жазғы демалыс кезеңінде ересектерден балалардың қауіпсіздігін тұрақты назарда ұстауды сұрап отыр.

Биылғы алғашқы бес айда Павлодар облысында балалардың қатысуымен 36 жол-көлік оқиғасы тіркеліп, оның салдарынан 3 бала көз жұмса, тағы 41 бала түрлі жарақат алды.

— Оқиғалардың 70 пайызында жаяу жүргіншілер кінәлі әрі олар жиі жарақат алады. Соңғы уақытта рулінде жасөспірімдер отырған мотоциклдердің, скутерлердің қатысуымен келеңсіз оқиғалар жиілеп кетті. Балалар өз эмоцияларын басқара алмайды, драйвқа көбірек сүйенеді, жылдамдық режимін сақтай алмайды. Ал мұның соңы ауыр зардаптарға әкеледі, — дейді Павлодар облысы полиция департаменті жергілікті полиция қызметінің бастығы Қуаныш Мұстафинов.

Еске сала кетейік, Павлодарда скутерге мінген екі жасөспірім Камазға соғылып көз жұмған еді.