Ертіс өзеніне су жіберуге дайындық шаралары басталды
ПАВЛОДАР. KAZINFORM — Әзірше су босатудың көлемі мен кестесі бекітілген жоқ. Жауапты органдар жіберілетін судың ауқымы өткен жылғыдан кем болмайды деп отыр.
Ертіс пен Шідерті өзендеріне су босату шаралары жыл сайын сәуір айында жүргізіледі. Бұл табиғи теңгерімді сақтауға, мал азығын молынан қамдауға бағытталған экологиялық үдеріс. Әсіресе Әулиекөлдегі 9 көлдің жүйесін сақтап қалуда маңызы зор.
— Біздің мамандар еліміздің шығысындағы тау өзендері мен су қоймалары маңындағы ылғалға апта сайын мониторинг жүргізіп, жағдайды бақылауда ұстап отыр. Негізі Ертіс өзенінің тасуына бүйірлік ағыстар әсер ететіні мәлім. Шығыс Қазақстан мен Абай облыстарындағы ылғал қоры мол екені байқалады. Бұқтырма су қоймасы маңайындағы ылғал қоры жылдағыдан көбірек. Ертістің оң бүйірінде аса ірі су қоймасы — Бұқтырма, Үлбі мен Оба, Күршім және басқа да өзендер орналасқан. Көктемде негізгі су көлемі осы оң бүйірден қосылады. Сол жақ бүйірінде Көкпекті, Қызылсай сияқты шағын өзендер тобы бар, бұл аумақтан аса көп көлемде су келмейді. Тағы бір атап өтерлігі, Тарбағатай тауларындағы ылғал қоры да жылдағыдан мол. Осының бәрі түптеп келгенде биыл Ертіске жіберілетін су көлемінің былтырғыдан көп болатынын байқатып отыр, — дейді Су ресурстары комитетінің су ресурстарын пайдалану және қорғау жөніндегі «Ертіс» бассейндік инспекциясы басшысының орынбасары Елеусіз Қамбаров.
Былтыр Ертіске 6,7 шаршы шақырым су жіберіліп, нәтижесінде өзен жайылмаларының 80 пайыздан астамы тіршілік нәріне қаныққан.
Өңірлік жер қойнауын пайдалану, қоршаған орта және су ресурстары басқармасының жауапты мамандары су қоймаларынан Ертіс өзеніне судың қашан босатылатынын болжап айту әзірше мүмкін емес екенін айтады. Оның мерзімі сәуір айының басында белгілі болып қалуы керек. Салааралық су босату комиссиясы биыл қанша көлемде су босатылатыны туралы шешім қабылдайды.
Еске сала кетейік, Павлодарда қыс ортасында Ертіс өзенінің деңгейі көтеріліп, шаруалар шөптерін таси алмай жатқаны туралы жазған едік.
Кейін Ертіс өзенінің арнасынан асу себебін бассейндік инспекция түсіндірді.
