Ертіс өзенінің жайылмасында құрғақ шөп пен қамыс өртенді
ПАВЛОДАР. KAZINFORM - Ақсу қаласының ауылдық аймағында пайда болған өрттен шамамен 44 гектар аумақ жанып кетті.
24 наурыз күні түскі уақытта Ақсу қаласына қарайтын Қ.Қамзин ауылдық округі Қарабай ауылы маңында дала өрті тіркелді. Ертіс өзенінің жайылмасындағы құрғақ шөпте тұтанған тілсіз жау кейін қамысты жерге өткен.
- Оқиға орнына Павлодар облысы төтенше жағдайлар департаментінің күштері мен құралдары, Қ.Қамзин ауылдық округі әкімдігінің өрт сөндіру бекеті, Павлодар орманшылығының орман күзетінің қызметкерлері, ерікті өрт сөндіру құрылымдары жіберілді. Өртті ауыздықтап, сөндіруге қамысты, батпақты жерлер әрі жылдамдығы секундына 15 метрге дейін жеткен екпінді жел көп қиындық тудырды. Үйлесімді іс-әрекеттердің күшімен сағат 22.57-де дала өрті толықтай сөндірілді. Өртенген жердің аумағы - шамамен 44 гектар, - деп хабарлады өңірлік Төтенше жағдайлар департаментінен.
Өрттің таралу қаупі жоқ. Тілсіз жауды жоюға 28 адам және 7 техника жұмылдырылған. Өрттің себебі анықталып жатыр.
Еске сала кетейік, Астанада 60 адам өрттен құтқарылды.
