Буырқанып аққан Есентай алматылықтарды алаңдатып қойды
АЛМАТЫ. KAZINFORM — Ақсай, Қарғалы, Үлкен және Кіші Алматы өзендері су деңгейінің көтерілгені байқалады.
Алматы қалалық төтенше жағдайлар департаментінің мәлеметінше, қазір қалада «Қазселденқорғау» мемлекеттік мекемесінің 10 гидропосты жұмыс істейді.
Олар тәулік бойы өзендердегі гидрометеорологиялық жағдайды бақылап отыр.
«Қала арқылы Ақсай, Қарғалы, Үлкен және Кіші Алматы өзендері ағады. Жауын-шашынға байланысты өзендерде су шығынының шамалы ғана көтерілгені байқалады, сондай-ақ көлбеу ағынға байланысты судың лайлануы 2 баллға дейін артты» деп хабарлады департаменттен.
Бұдан басқа, «Қазселденқорғау» мамандары селден қорғау құрылыстарының техникалық жай-күйіне тексеру жүргізеді.
«26 наурыздан бастап Алматы ТЖД жеке құрамы жұмыстың күшейтілген нұсқасына ауыстырылды, жедел штаб жұмыс істейді, қосымша тәулік бойы „Қазселденқорғау“ қалалық филиалы механикаландырылған бригада құрды. Сондай-ақ самосвалдар, тиегіштер, кран мен экскаватор тарта отырып, олар коммуналдық қызметтермен бірлесіп өзен арнасы мен тұндыру бассейндерін тереңдету жұмысын жүргізді» деді Алматы қаласы ТЖД бастығы Нұрлан Атығаев.
Таңғы сағат 4:00–ден басталған жауын әлі жауып тұр.
Ол арасы үзіліп-үзіліп 17 сәуірдің таңына дейін жауады деген болжам бар.
