Ескі базарларды жаңғырту жұмысы неліктен кешігіп жатыр
АСТАНА. KAZINFORM – Бүгінде елімізде ресми мәлімет бойынша 644 базар бар, биыл соның ішінде 100 базар қайта жаңартылады.
— Базарларды жаңғырту мәселесі министрліктің ерекше бақылауында, бұл жұмыс 10 жыл бұрын басталған. 2015 жылы сауда қызметін реттеу туралы заңға түзетулер енгізіліп, оған сәйкес ашық базар иелерін 2020 жылға қарай шыныдан және бетоннан жасалған ғимараттарға көшуін міндеттеді. Дегенмен қымбатшылыққа және пандемияға байланысты бұл жұмыс кейінге шегерілді. Базарларды жаңғыру облыстар үшін 2025 жылға дейін, ал Астана, Алматы және Шымкент қалалары үшін 2023 жылға дейінгі мерзімде бекітілді, — деді Сауда және интеграция министрлігі сауда комитетінің төрағасы Айдар Әбілдабеков Орталық коммуникациялар қызметі алаңында өткен баспасөз мәслихатында.
Дегенмен Сауда комитеті төрағасының айтуынша, әкімдіктер тарапынан бақылаудың жеткіліксіздігінен, пандемия кезінде құрылыс материалдарының қымбаттауы секілді бірқатар объективті себептерге байланысты базарларды жаңғырту жұмыстары уақтылы аяқталмаған.
— Салдарынан базарларды жаңғырту мерзімі екі рет ауыстырылды (2018, 2021 жылдар), — дейді спикер.
Ұлттық статистика бюросының мәліметіне сәйкес елімізде 644 базар бар. (412 әмбебап базар, 232 мамандандырылған базар) Оның ішінде жаңғыртылған базарлар саны:
— 2021 жылға дейін — 84 базар;
— 2021 жылы — 4 базар;
— 2022 жылы — 33 базар;
— 2023 жылы — 19 базар;
— 2024 жылы — 16 базар.
Айта кетейік, биыл елімізде 100 базар жаңартылады. Алдымен Сауда және интеграция министрлігінің өкілдері барлық базарды аралап, тексеріп шығады.
Сонымен қатар 2026 жылдан бастап уақтылы жаңартылмаған базар иелеріне айыппұл салына бастайды.
Сондай-ақ Сауда комитетінің төрағасы базарларды жаңғыртуға қаржы қайдан алынатынын айтты.
