Есімімді «Сұлтанбек ағамның аты өшпесін» деп әкем қойған – Сұлтанбек Қожанов
ТҮРКІСТАН. KAZINFORM – Кентау қаласында Алаштың арысы Сұлтанбек Қожановтың 130 жылдығына орай «Сұлтанбек Қожанов және ұлттық мемлекет құру идеясы: тарихы мен бүгінгі тәжірибелері» атты республикалық ғылыми-тәжірибелік конференция өтті.
Мемлекет және қоғам қайраткері, алаштың арда ұлы Сұлтанбек Қожановтың есімін ұлықтау мақсатында атқарылып жатқан жұмыстардың барысымен таныстырған Кентау қаласының әкімі Жандос Тасов конференция жұмысына сәттілік тіледі.
Ал, тарих ғылымдарының докторы, профессор Хазретәлі Тұрсұн «Сұлтанбек Қожановтың тергеу хаттамаларына ғылыми талдау», Өзбекәлі Жәнібеков атындағы Оңтүстік Қазақстан педагогикалық университетінің доценті Нариман Нұрпейіс «Сұлтанбек Қожанов - әдеби мұра жанашыры», Қазақстан Журналистер Одағының мүшесі Сұлтанбек Қожановтың жиен немересі Гүлсара Қабланова «Ата-анамның естеліктеріндегі Сұлтанбек Қожанов бейнесі» тақырыптарында кең көлемді баяндама жасады. Айтыскер ақын, Мемлекеттік «Дарын» сыйлығының иегері Бекарыс Шойбеков пен республикалық «Алтын қалам» байқауының лауреаты Ділда Нұрмаханбетова арнау айтты.
Бүгінде Кентау қаласында халқы үшін туған қайраткер Сұлтанбек Қожановтың ұрпақтары тұрады. Соның бірі алаш арысының кіші інісі Сейдолланың кенже баласы, атасының атын иемденген Сұлтанбек Қожанов.
Кентау трансформатор зауытында қызмет атқаратын Сұлтанбек бүгінге дейін әкесі мен атасы жайлы біршама мәліметтерді жинаған. Кітап жаздырып та, көпшілікке ұсынды. Ендігі мақсаты - атасы мен әкесі туралы тың деректерді толықтырып, еңбегін насихаттау.
«Менің атымды: «Сұлтанбек ағамның аты өшпесін, ұмытылмасын», деп әкем қойған екен. Бүгінде өзім де ұл-қыз өсіріп отырмын. Нұрдәулет, Нұрасыл, Албина, Әлия есімді ұл-қыздарым бар. Олар да аталары жайлы өлеңдерді, қарасөздерді жаттап алған. Мектебінде үлкен мақтанышпен айтып жүреді. 31 мамыр – саяси қуғын-сүргін құрбандарын еске алу күнінде және атам мен әкемнің қайтыс болған күндерінде ағайын-туысты жинап, аруағына жыл сайын құран бағыштап тұрамыз. Атам Сұлтанбек Қожановтың жерленген жері Мәскеу шетіндегі «Коммунарка» зиратынан табылғанда әулетімізбен қатты қуандық. Елді жинап ас бердік. Арнайы делегация туған жері Ақсүмбенің топырағын зиратына салып келді. Кейіннен кітап шығардық. Ендігі арманым- атам мен әкемнің өмірінен сыр шертетін кино түсіру», – дейді атасымен аттас Сұлтанбек Қожанов.
Конференция соңында алаш арысының еңбегін зерттеп, насихаттап жүрген ғалымдар мен зиялы қауым өкілдері Сұлтанбек Қожановтың 130-жылдық төсбелгісімен марапатталды.
