Есірткі қылмысы үшін 28 павлодарлық ұзақ жылға сотталды

ПАВЛОДАР. KAZINFORM - Жыл басынан полицейлер есірткі заттарына қатысты 144 заң бұзушылықтың жолын кескен. Заңсыз айналымнан 121 килограмнан асатын есірткі алынды.

Ертіс-Баян өңірінде жыл басынан есірткі қылмысына жол берген 28 азамат ұсталып, сот шешімінен ұзақ жылға сотталды.

- Заңсыз айналымнан 121 килограмнан астам түрлі тыйым салынған заттар, оның ішінде 9 килограмнан астам «гашиш», 102 килограмм марихуана және 9,7 килограмм синтетикалық есірткі тәркіленді. Сонымен қатар есірткіні заңсыз сақтаудың 82 фактісі анықталды. Мысал үшін синтетикадан шыққан психоактивті заттардың таралуына маманданған ұйымдасқан 2 қылмыстық топтың жол кесілді. Жедел іс-шаралар барысында алдын ала сөз байласу бойынша әрекет еткен 5 азамат ұсталды. Олар өңір аумағында қаптамашылар арқылы есірткі заттарын тарату мақсатында телеграмм мессенджерінде интернет дүкен құрған,-деп хабарлады Павлодар облысы полиция департаментінің нашақорлық қылмыстарына қарсы іс-қимыл жөніндегі басқармасының бастығы Тимур Қаржаубаев.

Тәртіп сақшылары жыл басынан есірткіге қатысты 144 заң бұзушылықтың жолын кескен. «Кибербақылау» жүйесі арқылы 75 заңсыз контентке қол жеткізу шектелді.

«OLX» хабарландыру сайтының қазақстандық провайдерімен бірлесіп 115-тен астам жарияланым жойылды. Олардың әрқайсысының аудиториясы бірнеше мыңнан миллионға дейін жетеді. Мұндай ақпараттық өнімдердің ең қорғалмаған санаттары мен негізгі тұтынушылары - балалар мен жасөспірімдер. Олар агрессивті үгіт-насихат әсеріне оңай түседі»,-дейді Тимур Қаржаубаев.

Мамандардың сөзінше, есірткі қылмысына қатысқан азаматтар кемі 10 жылға сотталады.

Бұған дейін Павлодарда ер адамнан 8,5 килограмм есірткі табылғаны туралы жазғанбыз.