Эталон орталығындағы күрделі жөндеуге қанша қаражат бөлінді

АСТАНА. KAZINFORM – Сауда және интеграция министрі Арман Шаққалиев Эталон орталығындағы күрделі жөндеуге қатысты түсінік берді.

Бүгін Парламент Мәжілісінде тілшілер елордадағы эталон сағатының таблосы неге іске қосылмай жатқанын сұрады. 

- Эталон сағаты жұмыс істеп тұр, тек оның циферблаты қосылмаған. Өйткені циферблат та, Эталон орталығы да күрделі жөндеуде. Бұл жұмыстарға 1,5 млрд емес, 700 млн бөлінді. Осы соманың азаюына байланысты сметалық құны да өзгереді. Қазір түзетулер енгізіліп отыр. Аталған нысанда жөндеу жұмыстары басталды, - деді Арман Шаққалиев. 

Оның айтуынша, уақыт эталонының жұмысы қадағалауда тұр және онда ешқандай ақау жоқ. 

- Қазір ол жерде тек экран ғана қосылмай тұр, яғни жөндеу жұмыстары себебінен. Жөндеу аяқталғаннан кейін, аталған экраннан уақыт көрсетіледі. 2026 жылы осы жұмыстар аяқталады, - деді министр. 

Еске салсақ, Астанадағы Эталон орталығы 2006 жылы ашылды.