Еуразия әлемдегі негізгі қозғаушы күшке айналуда - ШЫҰ Бас хатшысы

БЕЙЖІҢ. ҚазАқпарат - ШЫҰ-ның табысты дамуы - Еуразиядағы жалпы ахуалға байланысты болмақ. Бұл туралы Шанхай ынтымақтастық ұйымының (ШЫҰ) Бас хатшысы  Рашид Алимов мәлім етті, деп хабарлайды Қытайдағы «ҚазАқпарат» ХАА меншікті тілшісі.

«Еуразия әлемдік саясат пен экономикадағы негізгі қозғаушы тетікке айналуда. Оның басты құрамы - Шанхай ынтымақтастық ұйымы саналады. Ол Еуразия аумағының 60%-ын, әлем халқының 40%-ын алып жатыр, ал оған мүше елдер - «Үлкен Еуразия сегіздігі» әлемдік ЖІӨ-нің төрттен бірін өндіреді. ШЫҰ-ның ары қарай дамуы - әлемдегі басты өңірлердің жалпы ахуалына байланысты болмақ», - деді Р.Алимов Бейжіңдегі «Шанхай ынтымақтастық ұйымы: жаңа дәуір, жаңа даму» халықаралық форумында.

Оның айтуынша, ШЫҰ құрылғалы бері саясат, қауіпсіздік, экономика, мәдениет және гуманитарлық байланыс салаларындағы ынтымақтастықты дамытып келеді.

Іс-шара Қытай жалпы ғылым академиясы ШЫҰ Хатшылығының қолдауымен ұйымдастырылған. Сарапшылар өңірлік тұрақтылық пен кешендік қауіпсіздікті, ұйымға мүше елдердің бірлескен экономикалық дамуын, ШЫҰ аясында өзара әрекеттестікті күшейтудің жаңа тәсілдерін қалыптастыруды талқылады.