Euro-2024: Франция төртінші жеңісіне қол жеткізді

АСТАНА. ҚазАқпарат - Футболдан 2024 жылғы Еуропа чемпионатының іріктеу сатысында төртінші турдың бірінші ойын күні аяқталды, деп хабарлайды ҚазАқпарат тілшісі.

Бұл күні В тобында Франция құрамасы төртінші жеңісіне қол жеткізді. Өз алаңында Грекиямен күш сынасқан олар қарсыласынан 1:0 есебімен басым түсті.

Осылайша өз тобында бірінші орынға жайғасты. Олар екінші орында келе жатқан Грекиядан алты ұпайға ұзап кетті.

Аталған топтағы тағы бір кездесуде Ирландия құрамасы Гибралтарды 3:0 есебімен тізе бүктірді.

Ал С тобында Украина Мальтаны 1:0 есебімен жеңсе, Англия Солтүстік Македонияны 7:0 есебімен қапы қалдырды.

D тобында Армения Латвияны 2:1, Түркия Уэльсті 2:0, I тобында Беларусь Косовоны, Израиль Андорраны 2:1 еесбімен жеңсе, Швейцария мен Румыния 2:2 есебіне қанағат білдірді.

Еске салсақ, Еуропа чемпионатына іріктеу сатысы төртінші турында Қазақстан құрамасы сырт алаңда Солтүстік Ирландияны 1:0 есебімен жеңді.