Еуроодақ Мысырға 7,4 миллиард еуро көлемінде көмек көрсетеді
АСТАНА. KAZINFORM — Газа секторы мен Судандағы қақтығыс салдарынан Еуропаға миграциялық қысым күшеюі мүмкін деген алаңдаушылықтан Еуропалық Одақ Мысыр экономикасын нығайту үшін 7,4 миллиард еуро көлемінде көмек береді, деп жазады Euronews.
Келісімге Еурокомиссия төрағасы Урсула фон дер Ляйен мен Бельгия, Италия, Аустрия, Кипр және Грекия басшыларының Каирге сапары кезінде қол қойылады.
Көмек пакеті алдағы үш жылға (2024-2027) гранттар мен несиелерді қамтиды.
ЕО-ның Мысырдағы делегациясының құжатына сәйкес, бұл Каир мен Брюссель арасындағы әртүрлі салалардағы, соның ішінде экономикадағы ынтымақтастықты кеңейтуге жол ашады.
ЕО Мысыр үкіметіне шекарасын, әсіресе Африка мен Таяу Шығыстағы кедейлік пен қақтығыстан қашқан мигранттар үшін негізгі транзиттік нүкте саналатын Ливиямен шекарасын нығайтуға көмектеседі.
Мысыр ондаған жылдар бойы соғыстан немесе кедейліктен құтылуға тырысатын Сахараның оңтүстігіндегі Африкадан келген мигранттар үшін қорған болды. Көбі үшін Мысыр — ең жақын және қолжетімді ел. Басқалар үшін бұл Жерорта теңізінің Еуропаға өтуіне дейінгі транзиттік нүкте.
