Еуропа араб саммитінің Газа секторына қатысты шешімін қолдады

Германия, Франция, Италия және Ұлыбританияның сыртқы істер министрлері араб елдері әзірлеген және төрт күн бұрын Мысырда ұсынылған Газа секторын қалпына келтіру жоспарын қолдайтынын білдірді, деп хабарлайды DW.

Араб елдері әзірлеген Газа секторын қалпына келтірудің бес жылдық жоспары Еуропаның қолдауына ие болды. Германия, Франция, Италия және Ұлыбританияның сыртқы істер министрлері бұл жоспар өңірдегі екі миллионға жуық палестиналықтың ауыр жағдайын тез және ұзақ мерзімді перспективада жақсартудың шынайы жолын ұсынатынын бірлескен мәлімдемесінде атап өтті. Бұл туралы 8 наурыз, сенбі күні dpa агенттігі министрлердің мәлімдемесіне сілтеме жасап хабарлады.

Министрлердің айтуынша, бұл жоспарды жүзеге асыру үшін Израиль мен палестиналықтар үшін қабылданатын, ұзақ мерзімді бейбітшілік пен қауіпсіздікті қамтамасыз ететін берік негіз қажет. Мәлімдеме авторлары «барлық тарапты бұл жоспардың артықшылықтарын бастапқы нүкте ретінде пайдалануға» шақырды және 4 наурызда Мысырда ұсынылған құжаттың «Палестина автономиясының орталық рөлін нақты қолдайтынын» атап өтті.

— Біз ХАМАС-тың Газа секторын басқармауы және Израильге қауіп төндірмеуі тиіс екенін түсінеміз, — деп атап өтті Еуропаның төрт негізгі елінің сыртқы істер министрлері.

Араб саммиті Газа секторына қатысты Мысырдың жоспарын қолдады.

Араб мемлекеттері лигасының төтенше саммитіне қатысушылар Израильмен соғыс салдарынан қираған Газа секторын қалпына келтіруге арналған Мысыр жоспарын қолдады. Бұл жоспар палестиналықтарды қоныс аударуға мәжбүрлемей, 53 миллиард доллар (шамамен 50,5 миллиард еуро) көлемінде қаржы бөлуді көздейді.

4 наурызда Каирдегі саммит қорытындысы бойынша Мысыр президенті Абдель Фаттах ас-Сиси бұл шешімнің қабылданғанын мәлімдеді. Бес жылға есептелген бұл жоспар АҚШ президенті Дональд Трамп бұрын ұсынған «Таяу Шығыс ривьерасы» тұжырымдамасынан түбегейлі ерекшеленеді. Трамптың жоспары Газа секторының тұрғындарын «достас» араб елдеріне жаппай көшіруді көздеген болатын.

Өз сөзінде Мысыр президенті АҚШ президентінің ұсынысы араб елдері өкілдерінің қатаң сынына ұшырағанына қарамастан Трамптың да аймақтағы бейбіт реттеуге ықпал ете алатынына сенім білдірді.

— Шынайы бейбітшілік Палестина мемлекеті құрылмайынша орнамайды Бейбітшілік күшпен орнатылмайды және мәжбүрлеу арқылы жүзеге аспайды, — деді ас-Сиси саммиттің ашылуында. 

Бұған дейін Дональд Трамп Ақ үйде Израиль премьер-министрі Биньямин Нетаньяхуды қабылдап, АҚШ Газа секторын өз бақылауына алып, «жарылмаған қауіпті бомбалар мен басқа да қаруларды жоюға жауапты болады» деп мәлімдеген еді.

Трамптың бұл ұсынысы АҚШ-та және Германияны қоса алғанда, басқа елдерде сынға ұшырады.

Кейіннен Трамптың Газа тұрғындарын көшіру идеясы Таяу Шығыста да үлкен қарсылыққа тап болды. Сауд Арабиясы палестиналықтарды Газа секторынан күштеп шығаруға әрекеттерді жоққа шығарды. Иордания королі Абдалла II оның елі қатерлі ісікке шалдыққан 2 мың палестиналық баланы қабылдауға дайын екенін, бірақ АҚШ президентінің жоспарын жалпы қолдамайтынын мәлімдеді. Ал Мысыр палестиналықтарды көшіру туралы ұсыныстарды түбегейлі қабылдамай, бұл қадам палестиналық мәселені «жоюға» және аймақ елдерінің ұлттық қауіпсіздігіне қауіп төндіруге әкелуі мүмкін екенін айтты.

Айта кетелік араб саммиті Мысырдың Газа секторы бойынша жоспарын қолдаған еді.