Еуропарламент Еуропадағы су тасқынына байланысты қарар қабылдады

АСТАНА. KAZINFORM – Еуропарламент Аустрия, Чехия, Германия, Венгрия, Польша, Румыния және Словакиядағы жойқын су тасқыны туралы қарар қабылдады.

Құжат қол көтеру әдісі бойынша бекітілді. Еуропарламент мүшелері Еуропалық Одақтың азаматтық қорғау механизмінде бюджеттің қысқартылуына наразылық  танытып отыр.

Еуродепутаттар ЕО-ның келесі көпжылдық бюджетін ескере отырып, дайындықты және әлеуетті арттыру үшін қаржыландыруды кеңейтуге шақырады. 

ЕП мүшелері сондай-ақ ЕО Ынтымақтастық қоры «Еуропадағы табиғи апаттардың өсіп келе жатқан саны мен ауырлығына пропорционалды болуы тиіс» деп санайды. Олар Еуропалық комиссияны зардап шеккен елдер үшін қаржыландыруды жұмылдыруды жеделдетуге шақырып, бірігу саясаты құралдары сияқты басқа да техникалық және қаржылық қолдауды сұрап отыр. 

Қарарда атап өтілгендей, соңғы 30 жылда су тасқынынан 5,5 млн адамның зардап шеккені, 3 мың адамның қаза болғаны және 170 млрд еуродан астам экономикалық шығын келтірілген. 

Еуропарламент депутаттары ЕО және әлемде ауа райының қолайсыз жағдайлары, соның ішінде ауқымды тасқыны, аптап ыстық және орман өрттері қарқындылығы мен жиілігінің артуына қатты алаңдаушылығын білдірді. 

Ұзақмерзімді перспективада қарар ЕО-ны аймақтық және жергілікті тұрақтылыққа инвестицияны ұлғайтуға шақырып, ЕО-ның болашақтағы бірігу саясаты климаттың өзгеруін жеңілдету мен бейімделуге көбірек назар аударуды талап етеді. 

Еске сала кетсек, толассыз жауған жаңбыр Орталық Еуропада қатты су тасқынына себеп болды.