Евгений Кошкин конькимен жүгіруден Нидерландтағы турнирде алтын медаль жеңіп алды

АСТАНА. KAZINFORM –  Қазақстандық спортшы Евгений Кошкин конькимен жүгіруден Леуварденде (Нидерланд) Zilveren Bal турнирінде алтын медаль жеңіп алды.

Әлемдегі үздік спринтерлер арасында жыл сайын өтетін дәстүрлі жарыста Е.Кошкин 100 метр қашықтықта алдына жан салмады.

Польша өкілі Марек Кания мәре сызығын екінші болып қиса, америкалық Джордан Штольц үздік үштікті түйіндеді.

Осылайша, Евгений Кошкин қазақстандықтар арасында Zilveren Bal додасында алғаш рет жеңімпаз атанып отыр. Бұдан бұрын мұнда Нидерланд, Канада, Жапония, Ресей және Норвегия спортшылары озық шыққан еді.

Өткен жылы Е.Кошкин Леуварденде күміс медальға ие болған еді.

Еске сала кетейік, бұдан бұрын шорттрекші Денис Никишаның әлем чемпионатының екі мәрте күміс жүлдегері атанғанын жазған болатынбыз.