Face ID: Жолаушылар елорда әуежайында биометриялық сәйкестендіруден өтетін болады
Астана халықаралық әуежайынан жолаушылар биометриялық сәйкестендіру арқылы тіркеуден өтуі мүмкін, деп хабарлайды Kazinform әуежайдың баспасөз қызметіне сілтеме жасап.
Астана халықаралық әуежайынан жолаушылар биометриялық сәйкестендіру арқылы тіркеуден өтуі мүмкін, деп хабарлайды Kazinform әуежайдың баспасөз қызметіне сілтеме жасап.
Қазір әуежай басшылығы елорданың әуе қақпасына заманауи технологияны енгізу мүмкіндіктерін қарастырып, кедергілерді сараптап жатыр. Биометриялық сәйкестендіру арқылы тіркеу жүргізуді қолданысқа енгізуге еліміздегі биометриялық базаның бір жерге шоғырландырылмағаны кедергі болып тұр. Аталған мәселені жуық арада шешу және әуежайдағы цифрландыру деңгейін арттыру мәлелері жөнінде ҚР Көлік вице-министрінің орынбасары Мақсат Қалиақпаровтың төрағалығымен әуежайда жиын өтті.
«Астана халықаралық әуежайы IATA халықаралық әуе көлігі қауымдастығы мен ICAO халықаралық азаматтық авиация ұйымымен тығыз әріптестік орнатқан. Әрі осы халықаралық ұйымдардың стандарттарына сәйкес әуежай қызметін дамытуды жалғастырамыз. Биометриялық сәйкестендіру бағдарламасын енгізуді авиация саласындағы телекоммуникация және IT бағдарламаларды даярлауға негізделген шведцариялық ақпараттық ұйым SITA-мен бірлесе жүргізуге ниеттіміз. Биометриялық сәйкестендірудің көмегімен жолаушылар рейске тіркелу кезінде барлық қажетті операцияларды орындауға, құжаттарды өз бетінше толтыруға және басып шығаруға, төлқұжаттың электронды нұсқасын толық қолдануға мүмкіндік алады», - деді «Нұрсұлтан Назарбаев халықаралық әуежайы» АҚ Басқарма Төрағасы Ерғазы Жолдасов.
Айта кету керек, SITA-мен алдын ала келісім бойынша 27-30 қараша күндері жолаушыларды биометриялық сәйкестендіру арқылы тіркеу бағдарламасы Астана халықаралық әуежайында сынақ режимінде іске қосылады. Сынақ режиміне арнайы фокус-топ құрылған.
Жолаушыларды биометриялық сәйкестендіру арқылу тіркеу Дубай, Сингапур, Ганконг, Сербия және Пәкістанның халықаралық әуежайларында кең қолданылады.
