Фельдшер қазасы: Үй ақауларын көзбен шолып анықтауға бола ма
АСТАНА. KAZINFORM – Ұлдана Мырзуанның өліміне қатысты сот отырысында сарапшы Бауыржан Қазиев үйдің қаптама кірпішінің құлауына не себеп болғанын айтты.
Б. Қазиевтің айтуынша, қирауға сыртқы көпқабатты кірпіш қабырғаны тұрғызу кезінде жіберілген конструктивтік ақаулар мен технологиялық талаптардың бұзылуы себеп болған.
– Бұл бір ғана себептен болған жағдай емес. Негізгі себептердің қатарында жобада көзделген арматуралық белдеулердің болмауы, арматуралық торлардың болмауы немесе талапқа сай орнатылмауы, қаптама қабатының байланысы мен анкерленуінің бұзылуы бар. Қаланған жіктердің сапасыз ерітіндімен толтырылуы және жіктердің бос қалуы, жарықшақтардың ашылуы, қабырға қабаттарының арасындағы саңылаулар, сондай-ақ қаптама қабатына түсетін жүктемені дұрыс бөлмеу мен деформациялық жіктеудің болмауы да әсер еткен, – деді сарапшы.
Оның айтуынша, құлаудың тікелей механизмі – қаптама қабаты мен негізгі көтергіш қабаттың бірлесіп жұмыс істеу қабілетін жоғалтуы.
– Яғни қаптама қабаты жоғарыда орналасқан қатарлардың өз салмағын күшті жеткілікті деңгейде қайта бөлмей және негізгі қабырғамен берік байланыссыз қабылдаған.
Жарықшақтардың ұлғаюы, деформациялар мен саңылаулардың пайда болуы, қабырғаның ылғалдануы және қатуы ұзақ уақыт бойы жалғасып, нәтижесінде қалау біртіндеп әлсіреді. Соның салдарынан оның жекелеген бөліктері тұрақтылығын жоғалтып, құлады, – деп түсіндірді Бауыржан Қазиев.
Оның айтуынша, қираудың тікелей себебі – қаптама қабаты мен негізгі көтергіш қабырғаның біртұтас конструкция ретінде жұмыс істеу қабілетін жоғалтуы.
– Яғни қаптама қабаты жоғарыдағы кірпіш қатарларының салмағын негізгі қабырғамен жеткілікті деңгейде байланыспай және түсетін салмақты дұрыс бөлмей көтерген. Уақыт өте келе пайда болған жарықшақтар, деформациялар мен саңылаулар, сондай-ақ қабырғаның ылғалдануы мен қатуы қалау беріктігін одан әрі әлсіреткен. Соның салдарынан қабырғаның жекелеген бөлігі орнықтылығын жоғалтып, құлаған, – деп түсіндірді Бауыржан Қазиев.
Сарапшының айтуынша, құрылымның бұзылу процесі бірден емес, ұзақ уақыт бойы жүрген. Алдымен жарықшақтар пайда болған, кейін қаланған қабаттар бұзылып, саңылаулар мен деформациялар пайда болған. Қабырғаның ылғалдануы мен қатуы да конструкцияның біртіндеп әлсіреуіне әсер еткен.
Бауыржан Қазиев бұл ақаулардың барлығын тек көзбен шолып анықтау мүмкін болмағанын атап өтті. Оның айтуынша, мұны анықтау үшін аспаптық-техникалық зерттеу, геодезиялық өлшеулер және тексеру есептері қажет болған.
– Мұның бәрін тек көзбен қарап анықтау мүмкін емес. 2017 жылы жарықшақтар тіркелген, бұл процестің ұзақ уақыт бойы жүргенін көрсетеді. Әдетте жарықшақтар бірден байқалмайды, олар біртіндеп пайда болады. Ылғалдың әсері, сыртқы факторлар конструкцияға әсер етіп, қалау беріктігінің төмендеуіне әкеледі, – деп түсіндірді сарапшы.
Бұған дейін айыпталушы, Мүлік иелері бірлестігінің төрағасы болған С. Жұбаниязова үйді қандай жағдайда қабылдап алғанын айтқан еді.
Сондай-ақ, қасбеті құлаған үйде жаңа жарықшақтар пайда болған.
