Фин ғалымдары ұлысаралық төзімділіктің қазақстандық моделімен танысты
Қонақтар делегациясын Хельсинки университетінің Ресейдегі және Шығыс Еуропадағы үдерістерді зерттеу жөніндегі директоры Арто Пекка Луукканен бастап келді.
Қазақстандық тараптың атынан кездесуге Парламент Мәжілісінің депутаттары, Ассамблея Хатшылығының, Президент Әкімшілігінің, «Қазақстан халқы Ассамблеясы қоры» қоғамдық қорының өкілдері, ғалымдар мен журналистер қатысты.
Шара Финляндияда Қазақстан туралы бірегей кітап басылымын әзірлеу мәселесіне арналды. Диалог барысында қонақтар отандық ұлттық саясатты жүргізудің негізгі тетіктерімен, ЕҚЫҰ құрылымдарымен арадағы ынтымақтастық тәжірибесімен танысты.
Қонақтарға Қазақстан халқы Ассамблеясының қызметін таныстыратын «Қазақстан - жүрегім менің» деректі фильмі көрсетілді. Кездесу қорытындысы бойынша, финдер ұлысаралық ынтымақтастықтың қазақстандық моделінің оң тәжірибесін және республикада тұрып жатқан адамдардың құқықтарын қорғауды қамтамасыз ету мәселелеріндегі жетістіктерді атап өтті.