FlyArystan Алматыдан Қытайдың Чунцин қаласына тікелей рейс ашты
АСТАНА. KAZINFORM — Қазақстан мен Қытай арасындағы әуе қатынасы кеңейе түсті. 23 қыркүйектен бастап FlyArystan Алматы–Чунцин бағыты бойынша тұрақты рейстерді іске қосты. Бұл туралы Көлік министрлігі мәлім етті.
Қазақстан Республикасы Көлік министрлігі ұшу географиясын кеңейту және халықаралық рейстер санын арттыру бағытында тұрақты негізде жұмыс жүргізіп жатыр.
23 қыркүйекте қазақстандық «FlyArystan» әуе компаниясы Алматы – Чунцин жаңа бағыты бойынша тұрақты рейстерді іске қосты. Рейстер аптасына 2 рет – сәрсенбі және сенбі күндері «Airbus A320neo» әуе кемелерімен орындалады.
Қазақстан мен Қытай арасындағы әуе қатынасының ашылуы елдер арасындағы сауда-экономикалық, іскерлік, инвестициялық, туристік және мәдени ынтымақтастықты одан әрі дамытуға ықпал етеді.
Бұған дейін Қытайдан Алматыға туристік пойыз тұрақты қатынай бастағанын жаздық.
