Франция мен БАӘ ЖИ деректер орталығын салады

АСТАНА. KAZINFORM — Франция мен БАӘ 30-дан 50 млрд доллар шамасында инвестиция көздейтін қуаттылығы 1 гигаватт деректер орталығын салу туралы негіздемелік келісімге келді, деп хабарлайды Kazinform меншікті тілшісі.

Reuters агенттігінің деректеріне сүйенсек, бейсенбі күні президент Эммануэль Макрон өзінің әмірліктегі әріптесі шейх Мохаммед бен Заид Әл-Нахайянды қабылдады. Кездесу келесі аптада Парижде өтетін жасанды интеллект саммиті қарсаңында өтті. Аталмыш саммитте жасанды интеллекттің әлеуетін талқылау үшін 100-ге жуық ел бас қосады деп күтілуде.

10-11 ақпанда өтетін саммит Франция мен Еуропаны жасанды интеллект картасына шығаруға бағытталған. Себебі олар энергия көп қажет ететін технология саласында жетекші мемлекеттер АҚШ және Қытаймен бәсекелесуге тырысады.

— Екі ел көшбасшылары ЖИ саласында стратегиялық серіктестік құруға ниет білдірді. Сонымен қатар олар ЖИ саласында құн тізбегін дамытуды қолдайтын жобалар мен инвестициялар бойынша ынтымақтастық мүмкіндіктерін зерттеуге міндеттенді, — делінген бірлескен мәлімдемеде.

Екі ел де инвестициялар француз және әмірліктің жасанды интеллектіне, озық чиптерді, деректер орталықтарын сатып алуға, таланттарды дамытуға бағытталатынын атап өтті. Сондай-ақ қос тарап жасанды интеллект пен бұлттық технологиялардың егеменді инфрақұрылымын құруға мүмкіндік беретін виртуалды деректер елшіліктерін құруға ниетті екенін алға тартты.

Алғашқы инвестициялар туралы хабарландыру осы жылдың соңында Choose France саммитінде жасалатын көрінеді.

Еске салсақ, бұдан бұрын Kazinform тілшісі Францияның жаңа министрлер кабинеті экономиканы қалай дамытатынын саралап көрді.