Франция мен Бельгияда «Кирк» дауылы соқты

АСТАНА. KAZINFORM – Францияның Сена және Марна департаментінде су тасқыны туралы ескертудің қызыл деңгейі сақталып отыр. Бельгияның Кувен қаласының орталығын су басты, деп хабарлайды Еuronews. 

Францияда соққан «Кирк» дауылы салдарынан бір адам қаза тапқан. Бұл туралы жергілікті БАҚ хабарлады.

Дауыл кесірінен 70 мыңға жуық үй жарықсыз қалды. Елдің солтүстігінде жолдар мен ғимараттардың төменгі қабаттарын су басты. Сена және Марна департаментінде алдағы күндері тағы жауын-шашын болжанғанына байланысты су тасқыны туралы дабылдың қызыл деңгейі сақталып отыр. 

«Кирк» дауылы Франциямен көршілес Бельгияға да әсер етті. Корольдіктің оңтүстігінде жауын-шашын мол жауды. Кувен мен оның маңында күрделі жағдай сақталып, ондағы адамдар мен жануарларды армия тікұшағымен эвакуациялауға тура келді. 

Жергілікті билік ауыр жағдай артта қалды, енді апаттың салдарын жою керек деп шамалап отыр. 

Еске сала кетсек, «Милтон» дауылы түнде Флорида штатының орталық бөлігімен өтіп, соңы торнадоға ұласты, штаттағы он шақты үй қирады. 3 миллионнан астам үй мен кәсіпорын жарықсыз қалды. Соңғы мәліметке сәйкес, Флоридада «Милтон» дауылы құрбандарының саны 14 адамға жетті. 

Бұған дейін АҚШ-та 5 млн-ға жуық адам эвакуациялау туралы бұйрық алғаны хабарланған болатын. 

Florida State University, University of Florida, University of South Florida және University of Miami-де білім алып жүрген қазақстандық студенттер үйінде отыр. Оқу орындары уақытша жабылып, оқу процесі тоқтатылды.

Халықаралық бағдарламалар орталығы «Милтон» дауылының Флоридаға жақындағанына байланысты жағдайды бақылап отыр.