Футбол: Қазақстан құрамасының шабуылшысы «Астанадан» кетті
«Астана» футбол клубы мәлім еткендей, ойыншымен келісімшарт мерзімі бітті.
Командаға 2017 жылдың басында келген Роман «Астана» құрамында үш жылын өткізді. Осы мерзімде ол «Астанамен» бірге үш мәрте Қазақстан чемпиондығы мен суперкубокты ұтып алды. Сондай-ақ Еуропа лигасының топтық кезеңінде өнер көрсетті.
«Астана» футбол клубы Роман Муртазаевқа команда жеңісіне қосқан үлесі үшін алғысын айтып, спорттық жолын табыспен жалғастыруына тілектестігін білдірді.
Қазіргі кезде жаңа маусым алдында барлық командаларда ауыс-түйістер болып жатыр.
Ал премьер-лигада өнер көрсететін Көкшетаудың «Оқжетпесі» бас бапкер Андрей Карповичке тағы да сенім артып, еңбек шартын жалғастыратынын жария етті.
Еске сала кетейік, бұдан бұрын Қазақстан құрамасының Армениямен жолдастық кездесу өткізетінін жазған болатынбыз.