Футбол: «Шахтер» «Жетісуға» кеткен есесін қайтарды
АСТАНА. ҚазАқпарат - Бүгін футболдан Премьер-лига командалары арасындағы ел біріншілігінің 14-турындағы екі ойынның нәтижесі белгілі болды, деп хабарлайды ҚазАқпарат тілшісі.
Қарағандылық «Шахтер» өткен турда Талдықорғанның «Жетісуына» 0:1 есебімен кеткен есесін қайтарды.
Бұл жолы қарағандылық клуб сырт алаңда ойнағанына қарамастан жинақы қимыл көрсете білді.
Нәтижесінде олардың қатарынан Иван Свиридов 41, Роман Муртазаев 47, Кампо Мина Франциско 73-минуттарда мергендік танытса, «Жетісу» сапынан Алекс Рушевич 77-минутта көздеген нысанадан мүлт кеткен жоқ.
Осылайша «Шахтер» қарсыласынан 3:1 есебімен басым түсіп, турнир кестесіндегі жағдайын жақсарта түсті.
Тағы бір кездесуде «Ақтөбе» сырт алаңда Түркістан облысының «Мақтааралын» 2:1 есебімен жеңіп кетті. Ойын барысында түркістандық клуб сапынан Тоқтар Жаңғылышбай 32-минутта есеп ашқан еді. Оған «Ақтөбе» сапынан Милош Раичкович 45, Ньянгбо Франк Андерсон 56-минутта екі голмен жауап қайырды.
Өткен турда командалар 1:1 есебіне қанағат білдірді.
Енді 21:00-де «Қайсар» (Қызылорда) мен «Оқжетпес» (Көкшетау) шеберлік байқасады.
2 шілдеде «Тобыл» (Қостанай) мен «Атырау» (Алматы), «Ордабасы» (Шымкент) мен «Ақсу» (Павлодар облысы) кездеседі.
Сондай-ақ, 2 шілдеде 13-турдың екі ойынында «Қызылжар» (Петропавл) пен «Қайрат» (Алматы), «Каспий» (Ақтау) мен «Астана» ойнайды.
