Футболдан бірінші лигада «Елімай» «Тұраннан» жеті ұпайға ұзап кетті

АСТАНА. ҚазАқпарат – Футболдан бірінші лига командалары арасында ел чемпионатының 19-турында Семейдің «Елімайы» түркістандық «Тұранды» жеңіп, турнир кестесінде аталған қарсыласынан жеті ұпайға ұзап кетті, деп хабарлайды ҚазАқпарат тілшісі.

Турнир кестесінде командалар қатарлас тұрған еді. Жеңіске жеткен жағдайда «Тұран» «Елімайды» қуып жететін. Түркістандық клубтың басты қарсыласынан бір ойыны кем болатын.

Екі команда кездесуі аса тартысты өтті. Ойын тағдырын шешкен жалғыз голды «Елімай» футболшысы Арман Смайылов 85-минутта соқты.

Осылайша семейлік клуб қарсыласынан 1:0 есебімен басым түсіп, турнир кестесіндегі жағдайын жақсартып алды. Қазір аталған команда еншісінде 18 ойыннан кейін 50 ұпай бар. Ал «Тұран» 17 ойыннан 43 ұпай жинап, екінші орында тұр.

Аталған турда «Оңтүстік академиясы» «Қайрат-2» командасына 2:3, «Ақтөбе-2» «Түркістанға» 1:2, «Хан тәңірі» «Жас қыранға» 0:1 есебімен жеңіліп қалды.

Ал өз алаңында «Екібастұз» «Таразды» 5:3, «Қыран» «Ақжайықты» 3:1, «Жеңіс» «Астана-2» командасын 2:0 есебімен тізе бүктірді.

Енді 20-тур ойындары 17 және 18 тамыз күндері өткізіледі.

Еске салсақ, бұдан бұрын Конференция лигасында «Ақтөбе» сырт алаңда «Сепси» командасымен тең түсті.