Футболдан бірінші лигада «Ертіс» командасы көш бастады

АСТАНА. KAZINFORM — Футболдан бірінші лига командалары арасындағы Қазақстан чемпионатының 1-туры мәресіне жетті. 

Алғашқы турдың екінші ойын күні, 10 сәуірде өскемендік «Алтай» сырт алаңда Шымкенттің «Оңтүстік академия» клубымен кездесті. Бұл матчта өскемендік клуб қарсылас команданы 2:0 есебімен жеңіп, біріншілікті сәтті бастады.

Былтыр бірінші лигада жанкүйер тарапынан жоғары бағаланған Түркістан облысының «Жетісай» клубы биыл бірінші ойынында жинақы қимыл көрсетті. Олар сырт алаңда «Тараз» командасын 2:1 есебімен тізе бүктірді.

Тағы бір кездесуде Астананың «SD Family» алматылық «Қайрат-2» командасынан 3:0 есебімен жеңсе, алматылық «Хан тәңірі» «Ақтөбе-2» клубынан 2:0 есебімен басым түсті.

Аталған турдың алғашқы ойын күні, 9 сәуірде «Түркістан» өз алаңында қарағандылық «Шахтерге» 1:2 есебімен есе жіберсе, павлодарлық «Ертіс» «Екібастұзды» 4:0, ақтаулық «Каспий» Алматының AKAS клубын 3:1 есебімен жеңді.

Бірінші турдан кейін «Ертіс», «SD Family», «Каспий», «Алтай», «Хан тәңірі», «Шахтер», «Жетісай» үш ұпаймен алғашқы орындарда келеді.

Енді екінші тур ойындары 17 және 18 сәуір күндеріне белгіленген.