Футболдан Қазақстан біріншілігі: «Атырау» «Каспийден» басым түсті
Бұл жолы «Атырау» өз алаңында Ақтаудың «Каспий» командасын қабылдады. Еліміздің батыс өңіріндегі қос команда арасындағы жекпе-жек тартысты өтті.
Алаң иелері сапынан 16-минутта Гарсия Брайан Сильва есеп ашты. Ал 19-минутта оның командалас әріптесі Алекс Брунов есепті ұлғайтты.
Ойынның 40-минутында «Каспий» сапынан Давид Караев пенальтиден мүлт кетпеді. Бұдан кейін таблодағы есепке өзгеріс енген жоқ. Осылайша «Атырау» қарсыласын 2:1 есебімен тізе бүктірді. Қатарынан үш ойын бойы жеңіске жетіп, нәтижесінде 11 ұпаймен сегізінші орынға көтерілді.
Естеріңізге сала кетелік, бұған дейін елордалық «Астана» сырт алаңда «Ақтөбеден» 2:0 есебімен басым түскен болатын.
Дәл қазір «Тобыл» (Қостанай) мен «Тараз» кездесуінің бірінші кезеңінен кейін алаң иелері 2:0 есебімен жеңіп жатыр.
Енді 3 мамырда «Қызылжар» (Петропавл) мен «Қайрат» (Алматы), «Ордабасы» (Шымкент) мен «Тұран» (Түркістан), «Ақжайық» (Орал) пен «Жетісу» (Талдықорған), «Шахтер» (Қарағанды) мен «Қайсар» (Қызылорда) шеберлік байқасады.