Футболдан Қазақстан біріншілігі: «Қайрат» «Ақжайықтан» басым түсті
НҰР-СҰЛТАН. ҚазАқпарат - Бүгін футболдан Премьер-лига командалары арасындағы ел біріншілігінің 23-туры аяқталды, деп хабарлайды ҚазАқпарат тілшісі.
Аталған турдың екінші ойын күнінде Алматының «Қайраты» өз алаңында Оралдың «Ақжайығын» қабылдады. Ойын барысында алматылық клубтан Жоао Паоло 17, Небойша Косович 30, Артур Шушеначев 62-минутта мергендік танытты. Ал 88-минутта оралдық командадан Лука Имнадзе бір голмен жауап қайырды. Осылайша «Қайрат» қарсыласынан 3:1 есебімен басым түсті.
Сондай-ақ, тағы екі ойында «Тараз» бен «Атырау» 2:2 есебімен тең түссе, өз алаңында Ақтаудың «Каспийі» Петропавлдың «Қызылжарына» 1:2 есебімен жол берді.
Айта кетсек, 2 қазанда елордалық «Астана» сырт алаңда Талдықорғанның «Жетісуын», өз алаңында Қостанайдың «Тобылы» Шымкенттің «Ордабасысын» 3:1 есебімен жеңді.
Ал «Қайсар» Қызылордада «Ақтөбеден» 0:2 есебімен жеңілсе, «Тұран» (Түркістан) мен «Шахтер» (Қарағанды) 0:0 есебіне қанағат білдірді.
