Футболдан Қазақстан біріншілігі: «Қайрат» «Астанадан» жеті ұпайға қалып қойды
НҰР-СҰЛТАН. ҚазАқпарат - Футболдан Премьер-лига командалары арасындағы ел біріншілігі тоғызыншы турында Алматының «Қайраты» сырт алаңда Петропавлдың «Қызылжарымен» тең түсті, деп хабарлайды ҚазАқпарат тілшісі.
Бүгін аталған турдың екінші ойын күні өтіп жатыр. Жалпы барлығы төрт кездесу белгіленген.
«Қайрат» ойламаған жерден тағы да ұпай жоғалтты. Ойынның 28-минутында алматылық Денис Поляков есеп ашқан еді. Оған 78-минутта петропавлдық Әлібек Қасым бір голмен жауап қайырып, таразы басын теңестіріп кетті. Осылайша кездесу 1:1 есебімен тең аяқталды.
Нәтижесінде турнир кестесінде 16 ұпаймен «Қайрат» чемпиондықтан басты үміткер команданың бірі - «Астанадан» жеті ұпайға қалып қойды. Кеше елордалықтар сырт алаңда «Ақтөбеден» 2:0 есебімен басым түскен болатын.
Одан кейін «Атырау» өз алаңында Ақтаудың «Каспийін» 2:1 есебімен тізе бүктірді.
Үшінші кездесуде «Тобыл» «Таразды» 3:0 есебімен жеңді.
Сондай-ақ, бүгін аталған турда «Ордабасы» (Шымкент) мен «Тұран» (Түркістан), «Ақжайық» (Орал) пен «Жетісу» (Талдықорған), «Шахтер» (Қарағанды) мен «Қайсар» (Қызылорда) шеберлік байқасады.
