Футболдан Қазақстан біріншілігі: «Тобыл» «Ордабасыға» есе жіберді
НҰР-СҰЛТАН. ҚазАқпарат - Футболдан Премьер-лига командалары арасындағы Қазақстан біріншілігінің бесінші турының екі ойыны аяқталды, деп хабарлайды ҚазАқпарат тілшісі.
Қазірге дейін ел біріншілігі бесінші турындағы екі кездесудің нәтижесі белгілі болды.
Алдымен Оралдың «Ақжайығы» сырт алаңда «Атырауды» 1:0 есебімен тізе бүктірді.
Тағы бір кездесуде Қостанайдың «Тобылы» сырт алаңда Шымкенттің «Ордабасы» командасымен кездесті. Ойынның бірінші кезеңінде қостанайлық клубтан Александр Марочкин алаңнан қуылды. Соған байланысты 22-минутта белгіленген пенальтиден шымкенттік Эльхан Астанов мүлт кеткен жоқ. Оған 41-минутта Игорь Сергеев бір голмен жауап қайырды. «Ордабасы» сапынан Серж Ньюадзи 44, 85-минуттарда мергендік танытты.
Осылайша «Тобыл» сырт алаңда қарсыласына 1:3 есебімен есе жіберді.
Айта кетсек, аталған турда бүгін, 9 сәуірде елорда уақытымен 19.00-де Алматының «Қайраты» өз алаңында Ақтаудың «Каспий» командасын қабылдайды.
Сондай-ақ, 10 сәуірде «Шахтер» (Қарағанды) және «Мақтарал» (Түркістан облысы), «Ақсу» (Павлодар облысы) мен «Ақтөбе», «Тұран» (Түркістан) мен «Қызылжар» (Петропавл), «Астана» (Нұр-Сұлтан) мен «Тараз» командалары кездеседі.
