Футболдан Қазақстан чемпионатында «Ақжайық» «Ақсудан» ұтылып қалды
ОРАЛ. ҚазАқпарат - Футболдан Қазақстан чемпионатының сегізінші турында Оралдың «Ақжайығы» өз алаңында «Ақсуды» қабылдады, деп хабарлайды ҚазАқпарат тілшісі.
Осыған дейін үш рет қатарынан жеңіске жеткен оралдықтар турнир кестесінде 10-сатыда болса, «Ақсу» соңғы орындардың бірінде тұрған еді.
Бірінші таймда қонақтар көбірек шабуылдағанымен, есеп ашылған жоқ.
Есесіне ойынның екінші кезеңінде 67-минутта айып добы орындалғаннан кейін Арман Смайылов жеңіс голын соғып кетті.
Бұдан кейін «Ақжайық» ойыншылар алмастырып, таразы басын теңестіруге тырысқанымен, есеп өзгерген жоқ.
Қорытынды есеп - 1:0, «Ақсудың» пайдасында.
Еске сала кетейік, бұдан бұрын «Ақжайықтың» қатарынан үш рет жеңгенін, «Ордабасы» көш басына көтерілгенін жазған болатынбыз.
Суреттерді түсірген Айбатыр Нұраш.
