Футболдан Қазақстан құрамасы Кюрасаомен жолдастық кездесу өткізеді

АСТАНА. KAZINFORM — Бұл жөнінде Қазақстан футбол федерациясы мәлім етті. Кездесу 19 наурызда қазақстандық уақытпен 21:30–да басталады.

Кюрасао құрамасы ФИФА рейтингінде 91-орында тұр. Оларға әйгілі нидерландтық маман Дик Адвокат жетекшілік етеді.

— Екі тараптың келісімі бойынша матч жабық түрде өтеді. Мәтіндік және бейнекөрсетілім, негізгі құрам және бейнематериал болмайды, Ойын аяқталғаннан кейін фоторепортаж, матч нәтижесі мен гол авторлары хабарланады, — деп жазылған хабарламада.

Ұлттық құраманың ойыншысы Бақтиер Зайнутдинов қосымша медициналық қаралымнан өтіп, алдағы екі кездесуге қатыса алмайтыны белгілі болды.

Ал Рамазан Кәрімов пен Роман Асранкулов алған жарақатына байланысты оқу-жаттығу жиынында болған жоқ. 

2026 жылғы әлем чемпионаты іріктеу сатысында Қазақстан құрамасы J тобында сынға түседі. Қарсыластары — Бельгия, Уэльс, Солтүстік Македония және Лихтенштейн.

Матчтар 2025 жылдың наурызында басталып, қараша айында аяқталады.

Айта кетсек, Қазақстан құрамасы 22 наурызда сырт алаңда Уэльспен кездессе, 25 наурызда Лихтенштейнге қарсы ойнайды.