Футболдан Конференция лигасы: «Астана» «Виктория Пльзеньге» есе жіберді

Бүгін «Астана» футбол клубы Конференция лигасының топтық кезеңінде екінші ойынын өткізіп, Чехияның «Виктория Пльзень» командасымен кездесті, деп хабарлайды ҚазАқпарат тілшісі.

Елордада өткен матчтың бірінші кезеңінде екі команда ойыншылары жиі шабуылға шықты. Десе де таблодағы есепке өзгеріс енген жоқ.

Екінші кезеңде «Астана» шабуылшысы Марин Томасов 51-минутта тепкен доп қақпа торында тулап жатты. Бұл есеп көп сақталған жоқ. Чехиялық команда сапынан Томаш Хоры – 54, Лукаш Калвах 56-минутта екі гол соғып кетті.

Осылайша «Астана» қарсыласына 1:2 есебімен жол берді.

Астаналық клуб енді алдағы ойынын 26 қазанда сырт алаңда «Балкани» (Косово) командасына қарсы өткізеді.

Айта кетсек, алғашқы турда «Астана» Хорватияның «Динамо Загреб» командасына 1:5 есебімен есе жіберді.

Сондай-ақ аталған топта «Балкани» (Косово) және «Динамо Загреб» (Хорватия) командалары кездеседі.