Футболдан UEFA Ұлттар лигасында Англия Венгриядан жеңіліп қалды

НҰР-СҰЛТАН. ҚазАқпарат - Футболдан UEFA Ұлттар лигасында алғашқы турдың үшінші ойын күні өтті, деп хабарлайды ҚазАқпарат тілшісі.

Бұл күнгі басты кездесу А лигасы үшінші тобындағы Италия мен Германия арасында болды.

Матч барысында италиялық Лоренцо Пеллегрини 70-минутта есеп ашса, 73-минутта германиялық Йозуа Киммих таразы басын теңестірді. Осылайша құрамалар 1:1 есебіне қанағат білдірді.

Аталған топта сынға түсетін Венгрия Англияны 1:0 есебімен сүріндірді.

Ал В лигасы бірінші тобында Армения Ирландиядан 1:0 есебімен басым түсті. Бұл турдағы Шотландия және Украина кездесуі 21 қыркүйекке белгіленген.

Аталған лиганың үшінші тобында Финляндия мен Босния және Герцеговина 1:1 есебімен тең түссе, Черногория Румынияны 2:0 есебімен жеңді.

С лигасы бірінші тобында Литва Люксембургке 0:1 есебімен жол берсе, Түркия Фарер аралдарын 4:0 есебімен тізе бүктірді.

Енді 5 маусымда Ұлттар лигасында екінші тур ойындары басталады.

Еске салсақ, Қазақстан құрамасы футболдан UEFA Ұлттар лигасын жеңіспен бастады.