Футзалдан әлем чемпионаты: плей-офф сатысындағы ойындар жалғасады

АСТАНА. KAZINFORM - Бүгін, 25 қыркүйекте футзалдан әлем чемпионаты плей-офф сатысындағы екінші ойын күні өтеді.

Испания мен Венесуэла кездесуі елорда уақытымен 17:20-да басталып, «Qazsport» телеарнасынан тікелей эфирде көрсетіледі. Ал, Парагвай мен Ауғанстан құрамалары сағат 20:00-де шеберлік байқасады.

26 қыркүйекте Португалия мен Қазақстан, Иран мен Марокко кездеседі. 27 қыркүйекте плей-офф сатысында Таиланд пен Франция, Аргентина мен Хорватия кім мықтыны анықтайды. 

Алғашқы ойын күнінде Бразилия Коста-Рикадан 5:0, Украина Нидерландтан 3:1 есебімен басым түсті. 

Ел құрамасы D тобында Испаниямен 1:1 есебімен тең ойнаса, одан кейін Ливияны 4:1, Жаңа Зеландияны 10:0 есебімен тізе бүктірді. Нәтижесінде өз тобында Испанияны алға жіберіп, екінші орын алды. 

Айта кетсек, аталған сында ел намысын Нарун Серіков, Леонардо Игита, Арнольд Кнауб, Ринат Төреғазин, Ақжол Дәрібай, Әбдірасул Әбдіманапұлы, Азат Валиуллин, Лео, Альберт Ақбалықов, Шыңғыс Есенаманов, Біржан Оразов, Дәурен Тұрсағұлов, Жахангир Рашит және Дуглас Жуниор сынды жігіттер қорғап жатыр.

Қазақстан құрамасы әлем чемпионатының финалдық сатысында 2000, 2016, 2021 жылдарда сынға түсіп, 2021 жылы 4-орынға табан тіреді.