Футзалдан әлем чемпионатында Қазақстан құрамасының қарсыластары қалай ойнады

АСТАНА. KAZINFORM - Футзалдан Өзбекстанда өтіп жатқан әлем чемпионатында екінші турында Қазақстан құрамасының қарсыластары қалай ойнағаны белгілі болды.

Ел құрамасы D тобында Испания, Ливия және Жаңа Зеландиямен шеберлік байқасады.

18 қыркүйекте аталған топтағы Испания құрамасы Жаңа Зеландияны 7:1 есебімен тізе бүктірді.
Бұл күні Қазақстан құрамасы Ливиядан 3:1 есебімен басым түсті.

Нәтижесінде төрт ұпаймен Испания мен Қазақстан алғашқы екі орынды өзара бөлісіп тұр. Екеуі алғашқы турда 1:1 есебімен ұпай бөліскен еді. Ендігі кезекте аталған топта қай құраманың бірінші орын алатыны алдағы қарсыластарын қандай есеппен жеңетініне байланысты болып отыр. Әзірге бұл жөнінен Испания алда келеді.

Енді 21 қыркүйекте Қазақстан құрамасы Жаңа Зеландиямен кездессе, Испания Ливияға қарсылас атанады.

Айта кетсек, әлем чемпионатында ел намысын Нарун Серіков, Леонардо Игита, Арнольд Кнауб, Ринат Төреғазин, Ақжол Дәрібай, Әбдірасул Әбдіманапұлы, Азат Валиуллин, Лео, Альберт Ақбалықов, Шыңғыс Есенаманов, Біржан Оразов, Дәурен Тұрсағұлов, Жахангир Рашит және Дуглас Жуниор сынды спортшылар қорғайды.