Футзалдан екі дүркін әлем чемпионы Испания Венесуэладан жеңіліп қалды
АСТАНА. KAZINFORM — Футзалдан екі дүркін әлем чемпионы атанған Испания құрамасы 1/8 финалда Венесуэлаға жол берді.
Өзбекстанның Әндіжан қаласында өткен әлем чемпионатында кездесуде Оңтүстік Америка құрлығынан келген құрама алғашқы болып есеп ашты.
Бұл жолы қақпашы Хосе Вильялобостың тепкен добына ешкім тосқауыл қоя алған жоқ.
Екінші кезеңнің 23-минутында испаниялық Рауль Гомес таразы басын теңестірсе, 39-минутта Венесуэла құрамасынан Виктор Карреньо жеңіс голын соғып кетті.
Осылайша қарсыласына 1:2 есебімен жол берген испаниялық құрама жарыс жолын аяқтады.
Енді ¼ финалда Венесуэла құрамасы Украинамен шеберлік байқасады. Ойын 29 қыркүйекте Ташкент қаласында өтеді.
Айта кетсек, топтық кезеңде Испания құрамасы Қазақстанмен 1:1 есебімен тең ойнады.
Ел құрамасы ертең, 26 қыркүйекте Әндіжанда Португалиямен кездессе, Иран мен Марокко сайысқа түседі.
Сондай-ақ 27 қыркүйекте плей-офф сатысында Таиланд пен Франция, Аргентина мен Хорватия кездеседі.
