Футзалдан ел біріншілігінде «Аят» сәтті бастады
АСТАНА. KAZINFORM — Бүгін, 12 қазанда футзалдан Қазақстан чемпионаты жалауын көтерді. Жарыстың алғашқы күнінде үш ойын өткізілді.
Былтыр ел біріншілігінде қола жүлдегер атанған Рудныйдың «Аят» командасы жаңа маусымды сәтті бастады. Аталған ұжым бірінші турда өз алаңында Ақтаудың «Каспий» клубын 5:3 есебімен тізе бүктірді.
Ал Талдықорғанның «Жетісуы» мен Оралдың «Ақжайық» клубтары арасындағы ойын тартысты өтті. Бірінші кезеңде қарсыластар бір-бірден гол соқты. Екінші кезеңде талдықорғандық клуб жинақы ойнап, жеңіске қол жеткізді.
Аталған турда «Атырау» мен «Ордабасы» (Шымкент) 0:0 есебіне қанағат білдірді.
Енді аталған турда 17 қазанда «Тұлпар» мен «Қайрат», «Ақтөбе» мен «Астана» шеберлік байқасады.
Ережеге сәйкес плей-офф сатысына 8 команда жолдама алады. Ширек финал бір команданың екі жеңісіне дейін жалғасады. Жартылай финалда ол үш жеңіске дейін белгіленген. Ал, 3-орын үшін командалар екі жеңіске дейін бәсекеге түссе, финалда жеңімпаз үш жеңіс бойынша анықталады.
