Футзалдан Қазақстан құрамасы төртінші жеңісіне қол жеткізді
Қазақстан құрамасы футзалдан 2024 жылғы әлем чемпионатының элиталық іріктеу кезеңінде төртінші ойынын елордада Әзербайжанға қарсы өткізді, деп хабарлайды Kazinform.
Алғашқы минуттан құрамалар бірден шабуылға шықты. Нәтижесінде әзербайжан футзалшылары бірден екі гол соғып кетті. Ол 4 және 8-минутта Амадеу мен Кардозоның еншісіне жазылды.
Ал қазақстандық құрамадан Лео – 13, Біржан Оразов 18-минутта екі гол соғып, таразы басын теңестірді.
Ал 22-минутта ел құрамасынан Джуниор Дуглас мергендік танытып, команданы алға шығарды.
Осылайша Қазақстан қарсыласынан 3:2 есебімен басым түсіп, қатарынан төртінші жеңісіне қол жеткізді.
Айта кетейік, аталған топта 10 қыркүйекте Румыния мен Нидерланд құрамалары 1:1 есебімен тең түсті.
Төрт турдан кейін қазақстандық футзалшылар 12 ұпаймен көш басында тұр.
Ел құрамасы А тобында сынға түсіп жатыр. Қарсыластары – Румыния, Әзербайжан және Нидерланд. Қазақстандықтар бұдан бұрын Румынияны 4:3, Нидерландты 2:0 есебімен жеңген еді. Сондай-ақ сырт алаңда Әзербайжанды 4:2 есебімен тізе бүктірді.
Енді ҚР футзалшылары 14 желтоқсанда өз алаңында Нидерландпен кездессе, 20 желтоқсанда Румынияға барады.
2024 жылғы әлем чемпионаты Өзбекстанда өтеді.
