Газа секторы кемінде 10 жылға АҚШ протекторатына берілуі мүмкін

АСТАНА. KAZINFORM - АҚШ президенті Дональд Трамп әкімшілігінің Газа секторын қалпына келтіру жоспары Палестина анклавын кем дегенде 10 жылға америкалық протекторатқа беруді, сондай-ақ оның барлық тұрғынын уақытша қоныстандыруды көздейді. Бұл туралы АҚШ әкімшілігіндегі дереккөздерге сілтеме жасап The Washington Post хабарлады.

Басылымның хабарлауынша, Америка билігі Газа секторын қайта құру, экономикалық дамыту және трансформациялау үшін GREAT Trust (Gaza Reconstitution, Economic Acceleration and Transformation Trust) деп аталатын траст қорын құру жобасын әзірледі.

WP мәліметінше, ол «анклавты кем дегенде 10 жылға америкалық протекторатқа беруді» қарастырады.

Америка Құрама Штаттары Газа секторын қалпына келтіруге өз қаражатын салмай, кем дегенде 100 миллиард доллар инвестиция тартуды жоспарлайды, бұл инвесторларға төрт есе пайда әкелуі керек.

Сонымен бірге, жоспарда «кем дегенде Газаның екі миллионнан астам халқын уақытша көшіру» қарастырылған. Мүлікті одан әрі қалпына келтіруге беруге дайын жер иелеріне басқа жерлерден жылжымайтын мүлік сатып алу немесе анклав аумағында құрылысы жоспарланған «ақылды қалалардың» бірінен пәтерге айырбастау үшін пайдалануға болатын «цифрлық активтер» ұсынылуы мүмкін.

Сондай-ақ жоспарда Газа секторынан кетуге мәжбүр тұрғындарға 5 мың доллар көлемінде бір реттік төлем және субсидия қарастырылған.