Газа секторында Израиль шабуылынан 49 адам мерт болды
АСТАНА. KAZINFORM – Газа секторының түрлі аудандарында таң атқалы жүріп жатқан Израиль шабуылдарының салдарынан 49 палестиналық мерт болды, олардың төртеуі бала, деп хабарлайды Анадолы.
Газа қаласының солтүстіктегі палестиналық эксклавына әуеден және артилериядан жаппай оқ жаудырылып жатыр. Аман қалған ғимараттар жарылғыш заттар мен роботтардың көмегімен жермен-жексен етілген.
Газа секторында Израиль армиясының артиллериялық және әуе соққыларының күшеюіне байланысты жағдай аса күрделі және қауіпті күйінде қалды.
Батыс Рималь ауданында палестиналық отбасы тұрып жатқан шатырға жасалған шабуыл салдарынан 9 адам қаза тапты, оның ішінде 3 бала бар.
Қаланың солтүстік бөлігінде екі тұрғын үйге бағытталған соққылар 10 адамның өмірін қиды, жараланғандар да бар.
Джела көшесінде жүргізілген ұшқышсыз аппараттың (дронның) соққысынан бір палестиналық қаза тауып, бірнеше адам жарақат алды.
Кераме ауданының солтүстік-батыс бөлігінде адамдар жиналған орынға жасалған шабуылдан 5 адам қаза тауып, көптеген адам жараланды.
Дередж ауданының солтүстік-шығысында тұрғын үйге бағытталған соққы салдарынан 1 адам қаза тауып, 4 адам жараланған.
Қаланың оңтүстік бөлігінде, Зейтун ауданында, сондай-ақ Шейх-Рыдван су қоймасы маңында ғимараттар жарылғыш заттармен жабдықталған әскери техника мен роботтардың көмегімен жойылды. Сонымен қатар, Израильдің бронетехникасы Газаның оңтүстігінде ішінара алға жылжығаны хабарланды.
Газа секторының орталығындағы шабуылдар
Муграка елді мекенінде отын жинап жүрген палестиналық дрон соққысынан адам мерт болды.
Нусейрат босқындар лагерінің солтүстік және орталық аудандарына артиллериядан оқ жаудырылды.
Газа секторының оңтүстігіндегі шабуылдар
Израиль күштері солтүстік тұрғындарын оңтүстікке көшуге мәжбүрлеп отырғанымен, оңтүстік өңірде де шабуылдар болып жатыр.
Хан-Юнус қаласына жақын орналасқан Аль-Маваси ауданында Израиль әскерінің оғынан 3 палестиналық қаза тапты, олардың ішінде мүгедек әйел бар. Тағы 4 адам жараланған.
Имара Джасир ауданында бейбіт тұрғындар жиналған жерге жасалған шабуылдан 1 адам қаза тауып, 4 адам жарақат алды.
Хан-Юнустың шығыс бөлігінде, гуманитарлық көмек күтіп тұрған тұрғындарға жасалған шабуылдан 4 палестиналық қаза тапты, жараланғандар бар.
Күндізгі шабуылдардың қарқыны артты. Нусейрат лагерінде азаматтар тұрған шатырға тікелей соққы жасалып, 4 адам қаза болды. Газаның оңтүстігіндегі Сабра ауданында бейбіт тұрғындар тобына бағытталған соққыдан 5 адам мерт болды.
Қаза тапқандар арасында БАҚ қызметкері бар
Наср ауданында, үй маңындағы шатырға бағытталған соққы салдарынан 2 адам қаза тапты, олардың бірі — журналист Мұхаммед әл-Кувайфи.
Туффах ауданында ХАМАС жетекшілерінің бірі — Рухи Муштахидің 7 жасар қызы Султана Муштаха қаза тапты. Осы аудандағы тағы бір шабуыл кезінде тағы бір палестиналық көз жұмды.
Осыған дейін Израиль Газа қаласына шабуылға шыққаны туралы жаздық.
