Газадағы атысты тоқтату: ХАМАС пен Израиль арасындағы жаңа қадам
АСТАНА. KAZINFORM — ХАМАС сенбі күні АҚШ президенті Дональд Трамптың Таяу Шығыс жөніндегі арнайы өкілі Стив Уиткофф ұсынған атысты тоқтату туралы ұсынысқа жауапты делдалдарға тапсырғанын мәлімдеді, деп жазды Kazinform агенттігінің меншікті тілшісі Al Arabiya-ға сілтеме жасап.
Жауапта соғысты толық тоқтату талабы көрсетілген — бұл бұрын Израиль үшін қабылдауға келмейтін шарт ретінде қарастырылған.
Палестиналық ұйымның мәлімдемесінде мәміле шарттары бойынша ХАМАС он тірі тұтқынды босатуға және 18 қаза тапқан адамның денесін қайтаруға дайын екені айтылған, бұл Уиткофф ұсынған шарттарға сәйкес келеді.
Мәлімдемеде бұл ұсыныстың басты мақсаты — тұрақты атысты тоқтатуға қол жеткізу, Газа секторынан барлық әскерлерді шығару және халқымызға және отбасыларымызға гуманитарлық көмектің жеткізілуін қамтамасыз ету екені ерекше атап өтілген.
ХАМАС өз жауабын «ұлттық кеңестер раундын өткізгеннен кейін» жолдағанын айтты.
Мәлімдемеде ұсынысқа өзгерістер енгізу қажеттігі тікелей айтылмаса да, келіссөздер барысынан хабардар палестиналық шенеунік Reuters агенттігіне ХАМАС кейбір түзетулер ұсынғанын, бірақ жалпы жауаптың оң болғанын хабарлаған.
Израиль премьер-министрінің кеңсесі түсініктеме беруден бас тартты.
Осы аптада Израиль БАҚ-тары премьер-министр Биньямин Нетаньяхудың Газада ұсталып отырған тұтқындардың отбасыларына Израиль Уиткоффтың ұсынысын қабылдағанын айтқанын хабарлады. Алайда, премьер-министрдің кеңсесі бұл туралы ресми пікір білдірмеді.
ХАМАС пен Израиль арасындағы терең келіспеушіліктер бұған дейін наурызда үзіліп қалған бітімді қалпына келтіру әрекеттеріне кедергі келтірді.
Израиль ХАМАС-тың толық қарусыздануын, әскери және әкімшілік құрылым ретінде жұмысын тоқтатуын, сондай-ақ Газада қалған 58 тұтқынды босатуын талап етіп отыр. Осы шарттар орындалмайынша, соғысты тоқтату мүмкін емес деп санайды.
ХАМАС бұл талаптарды қабылдамай, Израиль әскерін Газадан шығарып, әскери әрекеттерді ресми түрде тоқтатуы тиіс деп мәлімдейді.
Израиль Газадағы әскери операцияны 2023 жылдың 7 қазанында ХАМАС-тың елдің оңтүстігіне жасаған шабуылына жауап ретінде бастады. Израильдің мәліметінше, сол күні шамамен 1200 адам қаза тауып, 251 адам тұтқынға алынып, Газаға жеткізілген.
Содан бері Газа Денсаулық сақтау министрлігінің деректері бойынша, Израильдің әскери операциясы салдарынан 54 000-нан астам палестиналық қаза тапты, ал анклавтың өзі қатты қирады.
Бұған дейін Al Arabiya ХАМАС пен Израиль Газада атысты 60 күнге тоқтату жөнінде келісімге келгенін хабарлаған болатын.
