Геолог күні – ел дамуына үлес қосқан мамандар мерекесі

АСТАНА. KAZINFORM – Бүгін, сәуір айының бірінші жексенбісінде геологтардың кәсіби мерекесі атап өтіледі. Бұл – жер қойнауын зерттеп, табиғи ресурстарды анықтау арқылы ел экономикасының дамуына тікелей үлес қосып жүрген мамандардың еңбегін айшықтайтын ерекше күн.

Қойнауы құтты еліміздің жерасты байлығын барлау, жаңа кен орындарын ашу және оларды тиімді игеру – геологтардың негізгі міндеті.

- Отандық мұнай-газ саласының қалыптасуында да осы саланың майталмандары шешуші рөл атқарды. Олардың қажырлы еңбегінің арқасында ашылған кен орындары бүгінде ел игілігіне қызмет етіп келеді, - деп жазды ҚазМұнайГаздан.

Қазақ мұнайының қара шаңырағы саналатын Ембі өңірі – талай кәсіби геологтарды тәрбиелеген ірі өндірістік мектеп. Бұл аймақ еліміздің мұнай өнеркәсібінің дамуына тарихи тұрғыда зор үлес қосқан.

Айта кетейік, Үш жылда геологиялық барлау саласына 280 млрд теңге жеке инвестиция тартылды.