Германияда ең қымбат автобан ашылды: бір метр жол 225 мың еуроға түсті

АСТАНА. KAZINFORM — Берлинде Германия тарихындағы ең қымбат автобан учаскесі — А100 жолының жаңа бөлігі ашылды. Бұл жолдың бір метрі бюджетке 225 мың еуроға түскен, деп хабарлайды DW. 

Жолдың ұзындығы — 3,2 шақырым, ал құрылыс жұмыстары 12 жылға созылған. Алты жолақты магистраль жерден 7 метр тереңдікте салынған. Жобалау кезінде тіпті жарқанаттардың тіршілігіне келетін қауіп те ескерілген.

Жаңа автобан учаскесі Берлинге жақын маңдағы қалалардан жұмысқа қатынайтын адамдардың жолын жеңілдетіп, қаладағы кейбір тұрғын аудандардың жүктемесін азайтады деп күтіледі.

Алайда жоба сынға да ұшырап отыр. Сыншылар бұл жол керісінше, көліктер санын арттырып, қаладағы экологиялық жағдайды нашарлатуы мүмкін дейді. Сонымен қатар, Берлинде бар жолдар мен көпірлерді жөндеуге, теміржол инфрақұрылымын жақсартуға қаржы жетіспей жатқанда, мұндай қымбат автобан салу қисынсыз деп есептейді.

Қарсы тарап Берлиннің көлік саясатында артта қалып отырғанын айтады: мысалы, Копенгаген, Вена және Барселона сынды қалаларда жаяу жүргіншіге арналған көшелер мен велосипед жолдары көбейіп жатқанда, Берлин 30 км/сағ жылдамдық шегінен бас тартып, велосипед жалдау жүйесіне субсидия беруді тоқтатты.

Айта кетейік, бұған дейін Германия автокөлік өнеркәсібі бір жылда 50 мыңнан астам жұмыс орнын қысқартқаны хабарланған.